• October 26, 2021

ത്രിഷയുടെ മാസ് ആക്ക്ഷന്‍ രംഗങ്ങളുമായി രാംഗിയുടെ ടീസര്‍ എത്തി

 ത്രിഷയുടെ മാസ് ആക്ക്ഷന്‍ രംഗങ്ങളുമായി രാംഗിയുടെ ടീസര്‍ എത്തി

തെന്നിന്ത്യയുടെ പ്രിയ താരം തൃഷയുടെ മാസ് ആക്ഷന്‍ ചിത്രം രാംഗിയുടെ ടീസര്‍ പുറത്തു വിട്ടു. തൃഷ തന്നെയാണ് ടീസര്‍ സോഷ്യല്‍ മീഡിയയിലൂടെ പുറത്ത് വിട്ടത്. തകര്‍പ്പന്‍ ആക്ഷന്‍ രംഗങ്ങള്‍ കൊണ്ട് നിറഞ്ഞതാണ് ടീസര്‍. എതിരാളികളെ മലര്‍ത്തിയടിക്കുന്ന തൃഷ ആക്ഷന്‍ രംഗങ്ങളില്‍ കസറുമെന്നാണ് ടീസര്‍ നല്‍കുന്ന സൂചന. നേരത്തെ പുറത്ത് വന്ന ചിത്രത്തിന്റെ പോസ്റ്ററുകള്‍ ഏറ്റെടുത്ത പോലെ തന്നെ ടീസറും ആരാധകര്‍ ആഘോഷമാക്കുകയാണ്.

എങ്കെയും എപ്പോതും എന്ന സിനിമയുടെ സംവിധായകനായ എം ശരവണനാണ് രാംഗി ഒരുക്കുന്നത്. സംവിധായകന്‍ എ.ആര്‍.മുരുഗദോസാണ് ചിത്രത്തിന്റെ കഥ രചിച്ചിരിക്കുന്നത്. തിരക്കഥയും സംഭാഷണവും ശരവണന്റേത് തന്നെയാണ്. സംഗീത സംവിധാനം ചെയ്യുന്നത് സി സത്യയാണ്. തണ്ണീര്‍ മത്തന്‍ ഫെയിം അനശ്വര രാജനുമുണ്ട് ചിത്രത്തില്‍.
44 സെക്കന്റ് ദൈര്‍ഘ്യമുള്ള ടീസറില്‍ ഡയലോഗുകളില്ല. ആക്ഷന്‍ ത്രില്ലര്‍ എന്നല്ലാതെ ചിത്രത്തെ കുറിച്ച് കൂടുതല്‍ വിവരങ്ങള്‍ അണിയറ പ്രവര്‍ത്തകര്‍ പുറത്ത് വിട്ടിട്ടില്ല. മനുഷ്യക്കടത്താണ് ചിത്രം കൈകാര്യം ചെയ്യുന്ന വിഷയമെന്ന് റിപ്പോര്‍ട്ടുകളുണ്ട്. അവസാനമായി തൃഷ അഭിനയിച്ച് പുറത്തിറങ്ങിയ ചിത്രം പേട്ടയായിരുന്നു. അനുഷ്‌ക ശര്‍മ്മയുടെ എന്‍ച്ച് 10 ന്റെ തമിഴ് റീമേക്ക്, സതുരംഗ വേട്ട 2 തുടങ്ങിയവയാണ് പുറത്തിറങ്ങാനുള്ള ചിത്രങ്ങള്‍.

Related post