• May 14, 2021

ഇടത് മുന്നണിയുടെ മനുഷ്യ മഹാശൃംഖല ഇന്ന്

 ഇടത് മുന്നണിയുടെ മനുഷ്യ മഹാശൃംഖല ഇന്ന്

പൗരത്വ നിയമ ഭേദഗതിക്കെതിരെ ഇടത് മുന്നണിയുടെ മനുഷ്യ മഹാശൃംഖല ഇന്ന് നടക്കും. വൈകിട്ട് നാലിന് കാസർഗോഡ് മുതൽ കളിയാക്കാവിള വരെയാണ് ദേശീയ പാതയോരത്ത് മനുഷ്യശൃംഖല തീർക്കുക. മുഖ്യമന്ത്രിയും മന്ത്രിമാരും സാംസ്‌കാരിക നായകരുമടക്കമുള്ളവർ വിവിധയിടങ്ങളിൽ ശൃംഖലയിൽ കണ്ണിചേരും.

പൗരത്വ നിയമ ഭേദഗതി നിയമത്തിനെതിരായ ഇടതുമുന്നണിയുടെ ഏറ്റവും വലിയ പ്രതിരോധമാണ് മനുഷ്യമഹാശൃംഖല. നിയമ ഭേദഗതിയെ എതിർക്കുന്ന പ്രതിപക്ഷകക്ഷികളെയടക്കം ശൃംഖലയിലേക്ക് ക്ഷണിച്ചിരുന്നു. എന്നാൽ, സഹകരിക്കാൻ തയാറല്ലെന്ന നിലപാടാണ് അവർ സ്വീകരിച്ചത്. എങ്കിലും രാജ്യത്തെ പ്രത്യേക സാഹചര്യത്തിൽ ലീഗിന്റേതുൾപ്പെടെ അണികൾ ശൃംഖലയുടെ ഭാഗമാകുമെന്നാണ് ഇടത് നേതാക്കൾ പറയുന്നത്.

620 കിലോമീറ്ററായിരിക്കും മനുഷ്യ മഹാ ശൃംഖല. ഏകദേശം 70 ലക്ഷത്തോളം പേര്‍ അണിനിരക്കുമെന്നാണ് എല്‍ഡിഎഫ് വിലയിരുത്തുന്നത്. ഞായറാഴ്ച ആയതിനാല്‍ കൂടുതല്‍ പേര്‍ക്ക് പങ്കെടുക്കാന്‍ സാധിക്കുമെന്നാണ് മുന്നണി വിലയിരുത്തല്‍.

Related post