• August 2, 2021

പത്തു വര്‍ഷത്തിനിപ്പറവും ആ ശീലം മാറിയില്ല; ദീപിക പദുകോണ്‍

 പത്തു വര്‍ഷത്തിനിപ്പറവും ആ ശീലം മാറിയില്ല; ദീപിക പദുകോണ്‍

സിനിമകള്‍ തിരഞ്ഞെടുക്കുന്നതിലെ രഹസ്യം പങ്കുവെച്ച് ദീപിക പദുകോണ്‍. ഇപ്പോഴും സിനിമകള്‍ തിരഞ്ഞെടുക്കുന്നതിനുള്ള തന്‌റെ രീതിയ്ക്ക് യാതൊരു മാറ്റവുമില്ലെന്ന് പറയുകയാണ് ബോളിവുഡിന്‌റെ താരസുന്ദരി. ”10 കൊല്ലം മുമ്പ് എങ്ങനെയായിരുന്നുവോ അങ്ങനെ തന്നെയാണ് ഞാന്‍ ഇന്നും സിനിമകള്‍ തിരഞ്ഞെടുക്കുന്നത്. എന്‌റെ ഹൃദയത്തെയാണ് ഞാന്‍ പിന്തുടരുന്നത്. എന്‌റെ കംഫര്‍ട്ട് സോണില്‍ നിന്നും പുറത്തേക്ക് എന്നെ കൊണ്ടു പോകുന്ന സിനിമകളാണ് ഞാന്‍ തിരഞ്ഞെടുക്കുന്നത്. കഥ പറഞ്ഞ് കഴിയുമ്പോള്‍ അടി വയറ്റില്‍ പൂമ്പാറ്റ പറക്കുന്നത് പോലെ അനുഭവപ്പെടണം. അല്ലെങ്കില്‍ ഞാന്‍ ചെയ്യില്ല” ദീപിക പറയുന്നു.

”അതിനര്‍ത്ഥം വളരെ തീവ്രമായ സിനിമ ആകണമെന്നല്ല. യേ ജവാനി ഹെ ദിവാനി പോലുള്ള സിനിമകള്‍ തിരഞ്ഞെടുത്തപ്പോഴും അതേപൊലെ തന്നെ ഞാന്‍ എക്‌സൈറ്റഡായിരുന്നു. കാരണം, നൈനയെ പോലൊരു കഥാപാത്രം ഞാന്‍ ചെയ്തിട്ടില്ലായിരുന്നു. എനിക്ക് വെല്ലുവിളി തോന്നണം. എന്റെ തലയ്ക്കുള്ളില്‍ നിന്നുമുള്ള ശബ്ദത്തെയാണ് ഞാന്‍ കേള്‍ക്കുന്നത്” താരം കൂട്ടിച്ചേര്‍ത്തു.

ആ വെല്ലുവിളി ഒരു പടികൂടി മുന്നോട്ട് കൊണ്ടു പോവുകയാണ് ദീപിക അടുത്ത ചിത്രത്തില്‍. ആസിഡ് അറ്റാക്കിന് ഇരയായാണ് ദീപിക അടുത്ത ചിത്രത്തില്‍ അഭിനയിക്കുന്നത്. മേഘന ഗുല്‍സാര്‍ സംവിധാനം ചെയ്യുന്ന ഛപാക് ആസിഡ് അറ്റാക്കിന് ഇരയായ ലക്ഷ്മി അഗര്‍വാളിന്റെ ജീവിതത്തെ ആസ്പദമാക്കിയുള്ളതാണ്. ചിത്രം നിര്‍മ്മിക്കുന്നതും ദീപികയാണ്. അതേസമയം, നിര്‍മ്മാതാവെന്ന നിലയിലും താന്‍ ശ്രദ്ധിക്കുക വാണിജ്യ വിജയത്തേക്കാള്‍ സിനിമ പറയുന്ന വികാരത്തെയായിരിക്കുമെന്നും താരം വ്യക്തമാക്കി.

2007ല്‍ ഷാരൂഖ് ഖാന്‍ ചിത്രം ഓം ശാന്തി ഓമിലൂടെ സ്വപ്ന തുല്യമായ അരങ്ങേറ്റമായിരുന്നു ബോളിവുഡില്‍ ദീപിക പദുകോണിന് ലഭിച്ചത്. പിന്നീട് താരത്തിന് തിരിഞ്ഞു നോക്കേണ്ടി വന്നിട്ടില്ല. ഹിറ്റുകള്‍ ഒന്നിനു പിറകെ ഒന്നായി താരത്തെ തേടിയെത്തുകയായിരുന്നു. ബോക്‌സ് ഓഫീസില്‍ പണക്കിലുക്കം സൃഷ്ടിക്കുമ്പോള്‍ തന്നെ നടിയെന്ന നിലയിലും സര്‍വ്വരാലും അംഗീകരിക്കപ്പെടുന്ന താരമായും ദീപിക മാറി. ബോളിവുഡിന്റെ അതിര്‍ത്തി കടന്ന് ഹോളിവുഡിലും ദീപിക സാന്നിധ്യമറിയിച്ചു.

Related post