• June 24, 2021

ലോകത്തിലെ ഏറ്റവും പ്രായം കൂടിയ പുരുഷന്‍ ബോബ് വീറ്റണ്‍ അന്തരിച്ചു

 ലോകത്തിലെ ഏറ്റവും പ്രായം കൂടിയ പുരുഷന്‍ ബോബ് വീറ്റണ്‍ അന്തരിച്ചു

ലോകത്തിലെ ഏറ്റവും പ്രായം കൂടിയ പുരുഷന്‍ എന്ന റെക്കോര്‍ഡ് നേടിയ ബോബ് വീറ്റണ്‍ അന്തരിച്ചു. 112 വയസ്സായിരുന്നു. ഇംഗ്ലണ്ടിലെ ഹാംപ്ഷയര്‍ സ്വദേശിയായ അദ്ദേഹം അര്‍ബുദ രോഗം ബാധിച്ചാണ് മരണമടഞ്ഞത്. മരണവിവരം വീറ്റണിന്റെ കുടുംബം സ്ഥിരീകരിച്ചു. ഇക്കഴിഞ്ഞ ഫെബ്രുവരിയില്‍, ഇതേ വയസ്സില്‍ ജപ്പാന്‍ സ്വദേശി ചിറ്റേത്സു വറ്റനാബേ മരണപ്പെട്ടതിനെ തുടര്‍ന്നാണ് വീറ്റണ്‍ ഈ നേട്ടത്തിലെത്തിയത്.

‘അദ്ദേഹം ഒരു അസാധാരണ മനുഷ്യനായിരുന്നു. ക്യാന്‍സറിനെ തുടര്‍ന്ന് ഉറക്കത്തില്‍ വളരെ ശാന്തിയോടെ അദ്ദേഹം മരണം വരിച്ചു. അദ്ദേഹം ഞങ്ങള്‍ക്കെല്ലാം മാതൃകയായിരുന്നു. ലോകമെമ്പാടുമുള്ള പല തരക്കാരായ ആളുകളുമായി ബന്ധം പുലര്‍ത്തി, മഹത്തായ ഒരു ജീവിതമാണ് അദ്ദേഹം നയിച്ചിരുന്നത്. എല്ലാവരെയും അദ്ദേഹം സ്‌നേഹിച്ചിരുന്നു. ധാരാളം വായിക്കുമായിരുന്നു. ഒട്ടേറെ സുഹൃത്തുക്കളും ഉണ്ടായിരുന്നു.”- കുടുംബം പറയുന്നു.

കൊവിഡ് ബാധയെ തുടര്‍ന്ന് തന്റെ 112ആം ജന്മദിനം വീടിനുള്ളില്‍ തന്നെയാണ് അദ്ദേഹം ആഘോഷിച്ചത്. നികുതി അടക്കുന്നവരുടെ തുക കൊണ്ടുള്ള സമ്മാനം തനിക്ക് വേണ്ടെന്ന് ചൂണ്ടിക്കാട്ടി ഇംഗ്ലണ്ട് രാഞ്ജി അയച്ച ജന്മദിന കാര്‍ഡ് അദ്ദേഹം തിരസ്‌കരിച്ചിരുന്നു.

മാര്‍ച്ച് 29, 1908ല്‍ ഹള്‍ എന്ന സ്ഥലത്ത് ജനിച്ച അദ്ദേഹം എഞ്ചിനീയറായി ജോലി ചെയ്തിരുന്നു. തായ്വാന്‍, ജപ്പാന്‍, കാനഡ തുടങ്ങിയ സ്ഥലങ്ങളിലാണ് അദ്ദേഹം ജോലി ചെയ്തത്.

Related post